Job 39

1 “Uyakwazi na ukuthi amagogo azala nini? Uyawubukele yini nxa impala izala izinyane layo?

2 Uyawuzibale yini izinyanga zize zizale? Uyasazi isikhathi ezizazala ngaso na?

3 Ziyalala phansi zizale abantwana bazo; bese-ke kuphela ubuhlungu bokuhelelwa kwazo.

4 Amazinyane azo ayaqina akhule abe lamandla egangeni; ayasuka ahambe angabuyi.

5 “Ngubani owakhulula ubabhemi weganga na? Ngubani owathukulula igoda lakhe na?

6 Ngamupha ugwadule lwaba likhaya lakhe, lamagceke etshwayi abe ngummango wakhe.

7 Uyazincifela iziphithiphithi zedolobho; kakuzwa ukukhahlanyezwa ngumtshayeli.

8 Uyazihambela abhode izintaba emadlelweni akhe edinga loba yini eluhlaza.

9 “Inyathi kambe izavuma ukukusebenzela na? Izahlala esibayeni sakho ebusuku na?

10 Ungayibamba ngomchilo ulime ngayo na? Ingazilima na izigodi zakho?

11 Ungayithemba yini ngenxa yamandla ayo amakhulu na? Ungawuyekelela yona umsebenzi wakho onzima na?

12 Ungayithemba ukuthi izalayitsha amabele akho na iwase esizeni?

13 Izimpiko zentshe ziphaphazela kakuhle, kodwa ngeke zilinganiswe lezimpiko kanye lezinsiba zengabuzane.

14 Ibekela amaqanda ayo emhlabathini iwayekele akhudumale etshebetshebeni,

15 ingalimukanga ukuthi unyawo oluthile lungawahlifiza, ukuthi inyamazana yeganga ethile ingawanyathela.

16 Amatshiyane ayo iyawakhahlameza ingathi kawasiwo wayo;

17 ngokuba uNkulunkulu kayiphanga ukuhlakanipha loba ingqondo yokubona okufaneleyo.

18 Kodwa nxa isiselula izimpiko zayo ukuthi igijime, iyalihleka ibhiza lomgadi walo.

19 “Uyalipha na wena ibhiza amandla kumbe ugqokise intamo yalo ngomhlonga na?

20 Uyalenza leqe njengentethe na, litshayise ngovalo ngokuhwabha kwalo kokuziqenya?

21 Liyaphanda ngenkani, lithokoziswa ngamandla alo, lidlubulunde lihlasela impi.

22 Liyakuhleka ukwesaba, kalesabi lutho; kaliyikhekhelezi inkemba.

23 Umxhaka wemitshoko ukhehlezela emhlubulweni walo, ndawonye lomkhonto obenyezelayo kanye lomdikadika.

24 Liyafuthelana ngamadlabuzane ligijime limbe phansi; kakulivumeli ukuma nxa icilongo selikhala.

25 Konela ukuthi likhale icilingo lihwabhe lithi, ‘Aha!’ Lihle lilizwe iphunga lempi isesekhatshana, ukukhwaza kwezinduna lomkhosi wempi.

26 Ukhozi luphatshiswa yikuhlakanipha kwakho na lwelule izimpiko zalo ziqonde eningizimu?

27 Ingqungqulu intweza ngokutshelwa nguwe yini kanye lokwakhela isidleke sayo esiqongweni?

28 Ihlala eliweni ilale khona ebusuku; idwala eliyiliwa yiyo inqaba yayo.

29 Idinga ukudla kwayo isuka khona; amehlo ayo akubona ekude.

30 Amatshiyane ayo azitika ngegazi, kuthi lapho okulababuleweyo khona layo ikhona.”